🍄
عمرك قد تساءلت ايش الكائن الحي اللي ما يتصنف لا من الحيوانات ولا النباتات؟؟
الييوم موضوعنا عن (الـفـطـر)🍄.
لا و نبات ولا هو حيوان ينتمي لمملكة مستقلة تمامًا وتقريبًا هو أقرب للحيوان بتركيبته من النبات وتركيب الحمض النووي حقه مقارب لتركيب الحمض النووي للإنسان…. بالمختصر هو بعييد عن النبات! مع أن أغلبنا يمكن كان يحسبه نبـات.
وأنـواع الفطر مرره كثيير تقريبًا 3 مليون نوع وطريقة تواصلهم وتكاثرهم غريبة عجيبه وبرضو الفطر يعتبر كائن ذكي وسريع التعلّم.
طيب كيف طريقة التكاثر؟ الفطر يطلق شيء اسمه أبواغ عبارة عن ذرات دقيقة جدًا تبدّا تطير بالجو وتدفعها الرياح لأماكن بعيدة و أول ما تقع على أرض رطبة " تفقس " وتطلع منها خيوط وهالخيوط تمشي وتمتد تحت الأرض وتأكل خشب أوراق شجر لين تقابل خيوط ثانية ويندمجون ( يندمجون ويسوون شبكة قوية تحت الأرض وهكذا ).
—————————
ليش قلت عنهم أذكياء ؟ فيه نوع فطر ذكي جدًا وهالشيء اتضح من تجربة سووها اليابانيين بحيث أنهم سووا نموذج لمدينة طوكيو وحطو أكل الفطر المفضّل ( الشوفان ) وفي أماكن المدن الرئيسية والمحطات.
اللي صار؟ الفطر رسم شكبة طُرق و وصل للأكل بأقصر وأذكى مسار ممكن! (سبحان الله)
الصورة اللي على اليمين تخطيط لطوكيو
واللي على اليسار المسار اللي أتخذه الفطر في الإنتشار للوصول للأكل.
والصدمة وين؟ أن تصميمه طلع نفس تصميم مترو أنفاق طوكيو الحقيقي اللي قعدوا سنين يصممونه وهالكائن اللي ماعنده مخ سووها بـ28 ساعه فقط.
—————————
لا مو ذكي وبس بل يعتبر أكبر وأقدم كائن على وجه الأرض!
أكبر من الحوت الأزرق بآلاف المرات ومساحته تحت الأرض تمتد لـ9 كيلو متر مربع يعني بحجم مدينة وعمره أكثر من 8700 سنة.
تغركم الحبة الصغيرة اللي تشوفونها برا لأنها من جوا شكلها زي كذا كائن واحد عملاق تحت الأرض واللي فوق مجرد ثمرة
—-—-—
شوفوا كيف شكلها تحت الأرض ! العلماء أكتشفوا أن تحت الأرض فيه شبكة اتصالات ضخمة وأعقد من الإنترنت اللي نتسخدمه وأطلقوا عليها أسم "wood wide web " يعني إنترنت الغابة.
—
طيب كيف هالنظام يشتغل؟ شفتوا خيوط الفطر الدقيقة هذه؟ مرتبطة حتى بجذور الأشجار وباقي النباتات وتشتغل كأنها أسلاك تلفون وكهرباء تنقل رسائل كيميائية وكهربائية بين الشجرة والثانية.
————————
يعني لو شجرة في أول الغابة هجمت عليها حشرة ترسل إشارة تحذير عبر خيوط الفطر لكل الأشجار اللي حولها وكل الأشجار تستلم الرسالة وتبدأ تفرز مواد كيميائية وسموم عشان تحمي نفسها قبل يوصلها الخطر.
—
وفيه بينهم تبادل مصالح ( الفطر و الشجر ) بمعنى أن الفطر يعطي الشجرة معادن وفوسفور من التربة و بالمقابل الشجرة تعطيه سكر يعني فيه بزنس يحدث تحتنا بس غير مدركين له 😅.
كنت اقول ما بقرا مقال طويل عن فطر شالفايده بس أول ما بدات المقال ما حسيت الا وخلصته مدري هو من جمال المعلومات ولا من ابداع الي كتب المقال عموما كثرو من ذي المقالات
سبحان الله فعلا المقالة مفيدة وبيها معلومات اول مرة اسمع عنها